Le cours d'occitan du Convise

Langue et culture occitane

Publié le jeudi 12 juillet 2018 à 18:16 dans Le Mot

Lo cors d’occitan del Convise

            Uèi Lo Convise es

            un ensemble istoric de rescontres e de sortidas  a estudiar, comunicar e  contunhar,

           l’aventura de sa revista,

           sas edicions,

           son obrador de cançons,

           mès es tanben definit per son cors d’occitan que dempuèi 30 ans desplega las riquesas de la cultura occitana e sas connexions d’avenir. Comencèt en 1988 a l’obrador de l’IEO ont veniáun entre autres Anna-Maria Neuvic, Irmà Fau, figuras inoblidablas, e… Kate, una jove veterinària anglesa, que partiá de zerò mès qu’a la fin de l’annada, avant de s’enanar pus lònh vos parlava un occitan raufi ambe un accent d’Oxford (o de Cambridge) un pauc coma la cantaire Jacmelina a sos debuts, talament deliciós que l’entende enquèra. Sovenirs.

            En 1992, annada del Convise-associacion, per l’entremesa clarvesenta de Joana Lescura,  l’Universitat-Intèr-Atges començanta me fisèt un obrador de lenga e cultura occitanas que arribèt a foncionar dusca tres nivèls amb l’intervencion de Lutz e l’adjonccion d’un cors de civilizacion. Medecins d’Orlhac, professors de latin, monde cultivat potinhavan pas la lenga nòstra e se botavan a l’escritura coma o rapèlan las paginas 788-789 de  mos Escrichs occitans cantaleses. Pecaire, 10 ans après, l’Universitat abandonèt son obrador per far plaça a un fotral de rasal occitan d’ensenhament, prepausat a un large public e dotat de subvencions especificas.

            De 2003 dusca uèi, un pauc estrechonit après aquel vormau, lo cors a contunhat jos la sola bandièra del Convise. Dempuèi quatre o cinc ans, Lutz a arrestat lo cors de primièr nivèl ont capitava mièlhs que cap pus, per çò que al començament de l’annada quauquas demandas d’infò li aviáun metut lo dobte : « Al mens, aquò’s pas tròp escolari ? » Çaquelai, es la volontat de transmetre quicòm qu’a perennizat aquel cors sempre renovelat. Çò pus fòrt sens dobte es estat la legida seguida de Quicòm endacòm de Ròc Tarvèl que nos tenguèt tota una annada ambe rescontre de l’autor a la fin. En junh 2018, la còla sortenta dels estudiants es pichona mès pas cufèla e se’n parlarà deman.

                                                                          Nadal Lafont (animator d'aquel cors). Article de la revista Lo Convise n° 103 (julhet de 2018)

La fotò representa Ròc Tarvèl lo jorn de mai 2005 ont èra vengut a Orlhac en conclusion d'una annada vosada a l'estudi de son obratge Quicòm endacòm)

           

                              

           

 

Revenir aux actualités

Retour en haut de page

Le cours d'occitan du Convise